ఐసీసీ మహిళా ప్రపంచకప్ సందర్భంగా ఇండోర్లో బస చేస్తున్న ఇద్దరు ఆస్ట్రేలియా మహిళా క్రికెటర్లపై వేధింపుల ఘటన తీవ్ర కలకలం రేపింది. రాడిసన్ హోటల్ నుంచి కేఫ్కు నడుచుకుంటూ వెళ్తున్న సమయంలో బైక్పై వచ్చిన అకీల్ ఖాన్ (Aqeel Khan) అనే వ్యక్తి వారిని వెంబడించి అసభ్యకరంగా తాకి (Inappropriately touched) అక్కడి నుంచి పారిపోయాడు. ఈ ఘటన గురువారం రాత్రి ఖజురానా రోడ్డుపై జరిగింది.
ఈ సంఘటనపై ఆస్ట్రేలియా టీమ్ మేనేజర్ డానీ సిమ్మన్స్ వెంటనే ఎంఐజీ పోలీస్ స్టేషన్లో ఎఫ్ఐఆర్ నమోదు చేశారు. పోలీసులు సీసీటీవీ ఫుటేజ్ మరియు స్థానిక సాక్షుల సహకారంతో బైక్ నంబర్ ఆధారంగా నిందితుడిని గుర్తించి, శుక్రవారం అదుపులోకి తీసుకున్నారు. నిందితుడిపై భారతీయ న్యాయ సంహిత (IPC) లోని సెక్షన్ 74 మరియు 78 కింద కేసు నమోదు చేశారు.
ఈ ఘటనపై ఐసీసీ ప్రతినిధి హిమాని మిశ్రా బాధిత క్రికెటర్లను కలిసి వారి స్టేట్మెంట్ తీసుకున్నారు. ఆస్ట్రేలియా క్రికెట్ బోర్డు ఈ సంఘటనపై తీవ్ర ఆగ్రహం వ్యక్తం చేస్తూ, భారత అధికారులను కఠిన చర్యలు తీసుకోవాలని కోరింది. ఐసీసీ మరియు స్థానిక అధికారులతో కలిసి విదేశీ ఆటగాళ్ల భద్రతను మరింత బలోపేతం చేయనున్నట్లు అధికారులు తెలిపారు.
