తెలంగాణ రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు, తెలంగాణను 2047 నాటికి 3 ట్రిలియన్ డాలర్ల ఆర్థిక వ్యవస్థగా తీర్చిదిద్దడానికి ఒక వినూత్న అభివృద్ధి నమూనాను ప్రతిపాదించారు. కాన్ఫెడరేషన్ ఆఫ్ ఇండియన్ ఇండస్ట్రీ (సీఐఐ) సదరన్ రీజినల్ కౌన్సిల్ సమావేశంలో ఆయన మాట్లాడుతూ, తమ దృష్టిలో జీడీపీ (GDP) అంటే కేవలం గ్రాస్ డొమెస్టిక్ ప్రొడక్ట్ మాత్రమే కాదని, అది గ్రాస్ ఎంపవర్మెంట్ ఆఫ్ పీపుల్ (GEP) అని పునరుద్ఘాటించారు. ఇది సమాజంలోని అన్ని వర్గాల సాధికారతకు తమ ప్రభుత్వం ఇస్తున్న ప్రాధాన్యతను తెలియజేస్తుంది.
రాష్ట్ర సమగ్రాభివృద్ధి కోసం మంత్రి శ్రీధర్ బాబు తెలంగాణ మొత్తం మూడు కీలక జోన్లుగా విభజించే రోడ్మ్యాప్ను సిద్ధం చేస్తున్నట్లు వివరించారు. ఈ మూడు మూల స్తంభాలు: 1. అర్బన్ ఇంజిన్ (హైదరాబాద్ను సర్వీసెస్, సస్టైనబిలిటీ, స్మార్ట్ లివింగ్కు గ్లోబల్ క్యాపిటల్గా మార్చడం, 2035 నాటికి హైదరాబాద్ జీడీపీని 350 బిలియన్ డాలర్లకు చేర్చడం), 2. ఇండస్ట్రియల్ హార్ట్ ల్యాండ్ (ఓఆర్ఆర్, ఆర్ఆర్ఆర్ మధ్య ప్రాంతాన్ని ‘గ్లోబల్ చైనా + 1’ అవకాశాలను అందిపుచ్చుకునే పారిశ్రామిక కారిడార్గా అభివృద్ధి చేయడం), 3. రూరల్ ట్రాన్స్ఫర్మేషన్ జోన్ (ప్రతి రైతును పారిశ్రామికవేత్తగా మార్చే లక్ష్యంతో అగ్రి ప్రాసెసింగ్ క్లస్టర్లు మరియు డిజిటల్ అనుసంధానం కలిగిన ఎంఎస్ఎంఈల ఏర్పాటు).
అంతేకాకుండా, మంత్రి దక్షిణాది రాష్ట్రాలన్నింటికీ కలిసికట్టుగా కృషి చేయడం ద్వారా ‘మేక్ ఇన్ సౌత్, స్కేల్ ఫర్ ది వరల్డ్’ అనే బలమైన ఆర్థిక వ్యవస్థను నిర్మించాలని పిలుపునిచ్చారు. టెక్నాలజీ రంగంలో ఏఐ ఇన్నోవేషన్ హబ్, ఏఐ సిటీ, ఇమేజ్ టవర్స్ వంటివాటితో రాష్ట్రంలో ఇన్నోవేషన్ ఎకోసిస్టమ్ను పటిష్టం చేస్తామని తెలిపారు. 2030 నాటికి 20 గిగావాట్ల పునరుత్పాదక శక్తిని ఉత్పత్తి చేయాలని లక్ష్యంగా పెట్టుకున్నామని, అలాగే ఆంధ్రప్రదేశ్ తరహాలో పరిశ్రమలు, ప్రభుత్వం మధ్య సత్సంబంధాల బలోపేతానికి ప్రత్యేక వ్యవస్థను ఏర్పాటు చేసేందుకు కసరత్తు చేస్తున్నామని కూడా మంత్రి వెల్లడించారు.
