బాలీవుడ్ సినీ పరిశ్రమలో విషాదం చోటుచేసుకుంది. ప్రముఖ నటి, గాయని సులక్షణా పండిట్ (Sulakshana Pandit) గుండెపోటుతో కన్నుమూశారు. 71 ఏళ్ల సులక్షణా పండిట్ ముంబైలో నిన్న రాత్రి తుదిశ్వాస విడిచినట్లు ఆమె సోదరుడు, ప్రముఖ సంగీత దర్శకుడు లలిత్ పండిట్ (జతిన్-లలిత్ ద్వయం) అధికారికంగా ప్రకటించారు. ఈరోజు (నవంబర్ 7) ఆమె అంత్యక్రియలు నిర్వహిస్తామని లలిత్ తెలిపారు.
సులక్షణా పండిట్ ఛత్తీస్గఢ్లోని ఒక ప్రముఖ సంగీత కుటుంబంలో జన్మించారు. ఆమె తండ్రి ప్రసిద్ధ సంగీత విద్వాంసుడు కాగా, ఆమె సోదరులు ఉధయ్ పండిట్, జతిన్ పండిట్, లలిత్ పండిట్—అందరూ సంగీత రంగంలో పేరు ప్రఖ్యాతులు సంపాదించారు. చిన్ననాటి నుంచే సంగీతంపై ఆసక్తి చూపిన సులక్షణా, తన సువర్ణ స్వరంతో బాలీవుడ్లో గాయనిగా అడుగుపెట్టారు.
1970లలో ఆమె గాత్రం ప్రతీ సంగీతప్రియుడి హృదయాన్ని తాకింది. ఆమె తన మధురమైన స్వరంతో అనేక హిట్ పాటలను అందించారు. ముఖ్యంగా ‘సంకల్ప్’ సినిమాలో పాడిన పాటకు గాను ఆమెకు ఫిలింఫేర్ అవార్డు లభించింది. ఆ పాట ఆమె కెరీర్లో మైలురాయిగా నిలిచింది. లతా మంగేష్కర్, ఆశా భోస్లే వంటి దిగ్గజ గాయకులతో కలిసి పాడి ఆమె తన ప్రతిభను చాటారు.
