తెలంగాణ ముఖ్యమంత్రి రేవంత్ రెడ్డి హైదరాబాద్ నగరంలో మరో అత్యాధునిక నగరాన్ని నిర్మించేందుకు తమ ప్రభుత్వం ప్రణాళికలు సిద్ధం చేసిందని తెలిపారు. దక్షిణ, పశ్చిమ రాష్ట్రాల, కేంద్ర పాలిత ప్రాంతాల అర్బన్ డెవలప్మెంట్ మినిస్టర్స్ రీజినల్ మీటింగ్లో ఆయన ఈ విషయాన్ని వెల్లడించారు. ఈ కొత్త నగరాన్ని 30 వేల ఎకరాల్లో ‘భారత్ ఫ్యూచర్ సిటీ’గా తీర్చిదిద్దుతున్నామని, ఇది దేశంలోనే అత్యుత్తమ సిటీగా నిలవనుందని తెలిపారు. తెలంగాణ రాష్ట్రాన్ని దేశానికి ఆదర్శంగా ఉండేలా తీర్చిదిద్దాలని లక్ష్యంగా పెట్టుకున్నామని, ఇందుకోసం 2047 విజన్ డాక్యుమెంట్ను కూడా సిద్ధం చేశామని ముఖ్యమంత్రి పేర్కొన్నారు.
భారత్ ఫ్యూచర్ సిటీ నిర్మాణానికి లక్ష్యాలను వివరిస్తూ, 2047 నాటికి దేశం ముప్పై ట్రిలియన్ ఎకానమీ లక్ష్యాన్ని చేరుకోవాలని ముఖ్యమంత్రి ఆకాంక్షించారు. హైదరాబాద్ నగరం వాతావరణ పరంగా, అన్ని రకాలుగానూ అనుకూలమైన నగరమని ఆయన తెలిపారు. ఈ అద్భుతమైన నగరాన్ని అభివృద్ధి చేయడంలో భాగంగా మెట్రో విస్తరణ మరియు మూసీ నది ప్రక్షాళన వంటి కీలక కార్యక్రమాలను చేపడుతున్నామని వివరించారు. ఈ ప్రాజెక్టులతో హైదరాబాద్ను ప్రపంచ స్థాయి నగరంగా తీర్చిదిద్దుతామనే విశ్వాసాన్ని వ్యక్తం చేశారు.
ముఖ్యమంత్రి రేవంత్ రెడ్డి మాట్లాడుతూ, తమకు పోటీ ఇతర భారతీయ రాష్ట్రాలు కాదని, టోక్యో, సింగపూర్, దుబాయ్ వంటి అంతర్జాతీయ నగరాలు మాత్రమే తమ లక్ష్యమని స్పష్టం చేశారు. ఆయా నగరాలతో పోటీ పడే విధంగా హైదరాబాద్ను రూపొందించే ప్రయత్నం చేస్తున్నామని తెలిపారు. ఈ బృహత్తర ప్రాజెక్టుల అమలుకు మరియు హైదరాబాద్ అభివృద్ధికి కేంద్ర ప్రభుత్వం తమకు సహకరించాలని ఆయన ఈ సమావేశం ద్వారా కోరారు.
