ఉత్తరప్రదేశ్లోని బారాబంకిలో చోటుచేసుకున్న ఒక ఘోర నిర్లక్ష్యం 38 ఏళ్ల మహిళ ప్రాణాలను బలితీసుకుంది. కడుపులో రాళ్ల సమస్యతో బాధపడుతున్న మునిశ్రా రావత్ను ఆమె భర్త కోఠి ప్రాంతంలోని శ్రీ దామోదర్ ఔషధాలయం పేరుతో నడుస్తున్న ఒక క్లినిక్కు తీసుకెళ్లాడు. అయితే, ఎలాంటి వైద్య అర్హతలూ లేని క్లినిక్ నిర్వాహకుడు గ్యాన్ ప్రకాశ్ మిశ్రా, తన మేనల్లుడు వివేక్ కుమార్ మిశ్రాతో కలిసి యూట్యూబ్ వీడియోలు చూస్తూ ఆ మహిళకు సర్జరీ ప్రారంభించడం ఈ విషాదానికి దారితీసింది.
క్లినిక్ నిర్వాహకుడు గ్యాన్ ప్రకాశ్ మిశ్రా సర్జరీ కోసం రూ.25,000 ఖర్చు అవుతుందని చెప్పి, ముందుగా రూ.20,000 తీసుకున్నాడు. అయితే, వైద్య అర్హత లేని వీరిద్దరూ యూట్యూబ్ వీడియోను అనుకరిస్తూ సర్జరీ చేసినప్పుడు, ఆ మహిళకు లోతైన కోతలు పడి తీవ్ర రక్తస్రావం జరిగింది. పరిస్థితి విషమించి, మునిశ్రా రావత్ మరుసటి రోజే మృతి చెందింది. ఈ సంఘటన తర్వాత నిందితులు ఇద్దరూ అక్కడి నుంచి పరారయ్యారు.
ఈ విషాదకర ఘటనపై పోలీసులు కేసు నమోదు చేశారు. క్లినిక్ను సీజ్ చేసిన అధికారులు, నిర్లక్ష్య హత్యకు సంబంధించిన సెక్షన్లతో పాటు ఎస్సీ, ఎస్టీ అట్రాసిటీ నిరోధక చట్టం కింద నిందితులపై కేసు నమోదు చేశారు. పరారీలో ఉన్న గ్యాన్ ప్రకాశ్ మిశ్రా, వివేక్ కుమార్ మిశ్రాల కోసం పోలీసులు గాలిస్తున్నారు.
