నేటి డిజిటల్ యుగంలో వార్తలు నిమిషాల్లో ప్రపంచమంతా వ్యాపిస్తున్నాయి. అయితే, నిజమైన వార్తల కంటే అసత్య వార్తలు (Fake News) సోషల్ మీడియాలో ఎక్కువగా ప్రచారమవుతుండటంపై హైదరాబాద్ పోలీసులు ఆందోళన వ్యక్తం చేశారు. ముఖ్యంగా మహిళలు, పిల్లల వ్యక్తిత్వాన్ని కించపరిచేలా, సమాజంలో అశాంతిని రేకెత్తించేలా ఉండే కంటెంట్ను ఫార్వర్డ్ చేసే వారిపై కఠిన చర్యలు తీసుకుంటామని హెచ్చరించారు. బాధ్యతారాహిత్యంగా వ్యవహరించే నెటిజన్ల కోసం పోలీసులు ప్రత్యేక మార్గదర్శకాలను విడుదల చేశారు.
పోలీసులు సూచించిన జాగ్రత్తలు ఇవే:
-
నిజ నిర్ధారణ: ఏదైనా మెసేజ్ను ఇతరులకు పంపే ముందు లేదా గ్రూపుల్లో ఫార్వర్డ్ చేసే ముందు అది నిజమో కాదో ప్రాథమికంగా నిర్ధారించుకోవాలి.
-
బాధ్యతాయుత ప్రవర్తన: వాట్సాప్ గ్రూపులు, ఫేస్బుక్, ఎక్స్ (ట్విట్టర్) వంటి వేదికల్లో మీరు చేసే ప్రతి పోస్ట్ లేదా షేర్ పట్ల మీరు బాధ్యత వహించాల్సి ఉంటుంది. ఒకవేళ అది తప్పుడు సమాచారమైతే చట్టపరమైన చిక్కులు తప్పవు.
-
ప్రతిష్ఠకు భంగం: కేవలం సెన్సేషనలిజం కోసం చూస్తూ ఫేక్ వార్తలను ప్రచారం చేయడం వల్ల మీ వ్యక్తిగత ప్రతిష్ఠ దెబ్బతినడమే కాకుండా, పోలీసుల విచారణను ఎదుర్కోవాల్సి వస్తుంది.
తప్పుడు వార్తలను వ్యాప్తి చేయడం చట్టరీత్యా నేరమని, సమాజ హితాన్ని దృష్టిలో ఉంచుకుని నెటిజన్లు విజ్ఞతతో వ్యవహరించాలని పోలీసులు కోరారు. ముఖ్యంగా అనుమానాస్పదంగా ఉన్న కంటెంట్ను ఏమాత్రం ప్రోత్సహించవద్దని సూచించారు.
