గుంటూరు నగరంలోని టైలర్స్ కాలనీకి చెందిన వైఎస్ఆర్సీపీ నాయకుడు తేజపై గుర్తు తెలియని దుండగులు అకస్మాత్తుగా దాడికి పాల్పడ్డారు. ఈ ఘటన స్థానికంగా తీవ్ర కలకలం రేపింది. వ్యక్తిగత కక్షలా లేక రాజకీయ ప్రేరేపిత దాడి అనే కోణంలో పోలీసులు విచారణ జరుపుతున్నారు. తీవ్ర గాయాలపాలైన తేజ ప్రస్తుతం స్థానిక ఆసుపత్రిలో చికిత్స పొందుతున్నారు.
ఈ దాడి విషయం తెలుసుకున్న వైఎస్ఆర్సీపీ రాష్ట్ర కార్యదర్శి కొనుదుల రమేష్ రెడ్డి వెంటనే స్పందించారు. ఆయన బాధితుడు చికిత్స పొందుతున్న ఆసుపత్రికి చేరుకుని, తేజను పరామర్శించారు. ఆయన ఆరోగ్యం గురించి వైద్యులను అడిగి తెలుసుకున్న రమేష్ రెడ్డి, మెరుగైన వైద్యం అందించాలని సూచించారు. బాధితుడి కుటుంబ సభ్యులకు ధైర్యం చెబుతూ పార్టీ అండగా ఉంటుందని భరోసా ఇచ్చారు.
ఈ సందర్భంగా కొనుదుల రమేష్ రెడ్డి మాట్లాడుతూ.. రాజకీయాల్లో హింసకు తావులేదని, ఇలాంటి దాడులను తీవ్రంగా ఖండిస్తున్నామని పేర్కొన్నారు. నిందితులను వెంటనే గుర్తించి, వారిపై కఠిన చట్టపరమైన చర్యలు తీసుకోవాలని ఆయన పోలీసు అధికారులను డిమాండ్ చేశారు. శాంతిభద్రతలకు విఘాతం కలిగించే వారు ఎంతటి వారైనా వదిలిపెట్టకూడదని ఆయన స్పష్టం చేశారు.
