రష్యాతో కీలక చర్చలు – మేకిన్ ఇండియాకు బూస్ట్
హైదరాబాద్లో జరిగిన వింగ్స్ ఇండియా ఎయిర్ షో సందర్భంగా భారత్, రష్యా మధ్య రక్షణ రంగ ఒప్పందాలపై కీలక చర్చలు జరిగాయి. రష్యాకు చెందిన ఐదో తరం అత్యాధునిక యుద్ధ విమానం Su-57 (Su-57E) ను భారత్లో సంయుక్తంగా తయారు చేసేందుకు రష్యా ప్రతిపాదించింది. ప్రస్తుతం సుఖోయ్ Su-30MKI విమానాలను తయారు చేస్తున్న హిందుస్థాన్ ఏరోనాటిక్స్ లిమిటెడ్ (HAL) ప్లాంట్లనే ఇందుకోసం ఉపయోగించే అవకాశం ఉంది. దీనివల్ల భారతీయ విడిభాగాలు, స్వదేశీ సాంకేతికతతో ఈ యుద్ధ విమానాలు తయారవుతాయి.
Su-57 ప్రత్యేకతలు – ఆకాశంలో రారాజు
రష్యా రూపొందించిన ఈ Su-57 ఫైటర్ జెట్ శత్రు దేశాల రాడార్లకు చిక్కని ‘స్టీల్త్’ సాంకేతికతను కలిగి ఉంటుంది. ఇది ధ్వని కంటే రెండు రెట్లు ఎక్కువ వేగంతో ప్రయాణించడమే కాకుండా, సుమారు 1500 కిలోమీటర్ల దూరంలో ఉన్న లక్ష్యాలను కూడా అత్యంత ఖచ్చితత్వంతో ధ్వంసం చేయగలదు. ఇది హైపర్ సోనిక్ మిస్సైళ్లను ప్రయోగించే సామర్థ్యం కలిగి ఉండటం విశేషం. చైనాకు చెందిన J-20 స్టీల్త్ ఫైటర్లకు దీటుగా భారత్ ఈ విమానాలను మోహరించాలని భావిస్తోంది.
భారత్కు ఎందుకు అవసరం?
ప్రస్తుతం భారత వైమానిక దళంలో యుద్ధ విమానాల సంఖ్య క్రమంగా తగ్గుతోంది. చైనా తన సరిహద్దుల్లో అత్యాధునిక జె-20 విమానాలను పెంచుకుంటున్న తరుణంలో, భారత్ తన రక్షణ వ్యవస్థను బలోపేతం చేసుకోవడం అనివార్యమైంది. భారత స్వదేశీ ఐదో తరం విమానం ‘ఏఎంసీఏ’ (AMCA) పూర్తిస్థాయిలో అందుబాటులోకి రావడానికి సమయం పడుతుంది కాబట్టి, అప్పటివరకు Su-57 ఒక వారధిలా ఉపయోగపడుతుందని నిపుణులు భావిస్తున్నారు. యుద్ధ విమానాలతో పాటు రష్యాకు చెందిన సూపర్జెట్-100 (SJ-100) రవాణా విమానాల తయారీపై కూడా HAL మరియు రష్యా యూఏసీ మధ్య ఒప్పందం కుదిరింది.
