హైదరాబాద్లోని నాంపల్లిలో ఉన్న అత్యంత కీలకమైన స్టేట్ ఫోరెన్సిక్ సైన్స్ లాబొరేటరీ (FSL)లో శనివారం ఉదయం భారీ అగ్నిప్రమాదం సంభవించింది. భవనంలోని మొదటి అంతస్తులో ఉన్న కంప్యూటర్ ల్యాబ్లో మంటలు చెలరేగి వేగంగా వ్యాపించాయి. సమాచారం అందుకున్న అగ్నిమాపక సిబ్బంది ఐదు ఫైరింజన్ల సహాయంతో మంటలను అదుపులోకి తెచ్చారు. ఈ ప్రమాదంలో సుమారు 40 నుండి 50 కంప్యూటర్లు పూర్తిగా దగ్ధమైనట్లు పోలీసులు ప్రాథమికంగా నిర్ధారించారు.
ఈ ప్రమాదంపై బీఆర్ఎస్ నాయకుడు ఆర్ఎస్ ప్రవీణ్ కుమార్ తీవ్రంగా స్పందిస్తూ పలు అనుమానాలు వ్యక్తం చేశారు. గట్టి భద్రత ఉండే ఫోరెన్సిక్ ల్యాబ్లో ప్రమాదం జరగడం వెనుక కుట్ర దాగి ఉందని ఆయన ఆరోపించారు. ముఖ్యంగా 2015 నాటి ‘ఓటుకు నోటు’ కేసుతో సహా అనేక సంచలన కేసులకు సంబంధించిన హార్డ్ డిస్కులు, డిజిటల్ ఆధారాలు ఇక్కడే ఉన్నాయని, వాటిని నిర్మూలించే ప్రయత్నంలో భాగంగానే ఈ అగ్నిప్రమాదం జరిగి ఉండవచ్చని ఆయన మండిపడ్డారు.
ప్రస్తుత పాలకులు ఆధారాలను తుడిచిపెట్టేందుకు ఎంతకైనా తెగిస్తారని విమర్శిస్తూ, ఈ ఘటనపై తక్షణమే ఉన్నత స్థాయి విచారణ జరిపించాలని ఆయన డిమాండ్ చేశారు. అమెరికాలోని ఎప్స్టీన్ ఉదంతాన్ని ఉదాహరణగా చూపిస్తూ, కీలక సాక్ష్యాలు భద్రంగా ఉన్నాయో లేదో ప్రభుత్వం స్పష్టం చేయాలని కోరారు. కీలకమైన కేసులు దర్యాప్తు దశలో ఉన్న తరుణంలో ఈ అగ్నిప్రమాదం జరగడం రాష్ట్ర రాజకీయాల్లో పెను దుమారం రేపుతోంది.
