రైలు ఏసీ కోచ్లో ప్రయాణిస్తున్న ఓ మహిళా ప్రయాణికురాలు తన పర్సు చోరీకి గురికావడంతో ఆగ్రహం పట్టలేక ఏకంగా కంపార్ట్మెంట్ కిటికీ అద్దాన్ని ట్రేతో కొట్టి పగలగొట్టిన ఘటన చోటుచేసుకుంది. రైల్వే అధికారుల నుంచి తనకు ఎలాంటి సహాయం అందకపోవడంతో ఆమె నిస్సహాయత, కోపంతో ఈ చర్యకు పాల్పడినట్లు నివేదికలు చెబుతున్నాయి. ఈ ఘటనకు సంబంధించిన వీడియో సోషల్ మీడియా ప్లాట్ఫామ్ ‘X’ (గతంలో ట్విట్టర్)లో వైరల్ అవుతోంది.
వైరల్ అవుతున్న వీడియోలో, ఆందోళనగా ఉన్న ఆ మహిళ కోపంతో ఊగిపోతూ, తోటి ప్రయాణికులు ఆపమని అడుగుతున్నా పట్టించుకోకుండా, పదేపదే ట్రేతో అద్దాల కిటికీని కొడుతున్న దృశ్యం ఉంది. కాసేపటికే కిటికీ పూర్తిగా పగిలిపోయి, అద్దాల ముక్కలు కోచ్ ఫ్లోర్పై పడ్డాయి. ఈ విధ్వంసం జరిగినంతసేపు ఆమె పక్కనే చిన్నారి కూర్చుని ఉండటం, కిటికీని పగలగొట్టే క్రమంలో ఆమె తన అరచేతికి గాయం చేసుకోవడం కూడా కనిపించింది.
ఈ వీడియో చూసిన నెటిజన్లు మిశ్రమంగా స్పందించారు. కొందరు యూజర్లు రైల్వే మంత్రి అశ్విని వైష్ణవ్ను ట్యాగ్ చేసి, ప్రతి రైలులో మహిళా RPF/GRP సిబ్బందిని పెద్ద సంఖ్యలో నియమించాలని డిమాండ్ చేశారు. మరికొందరు, ఆ మహిళ ప్రవర్తన మానసిక ఆరోగ్య సమస్యను సూచిస్తుందని ఆందోళన వ్యక్తం చేస్తూ, పబ్లిక్ న్యూసెన్స్ మరియు పిల్లల భద్రతపై ఆందోళన చెందారు. అయితే, దొంగతనం జరిగినప్పుడు రైల్వే సిబ్బంది స్పందించకపోవడం వల్లే ఆమె నిగ్రహం కోల్పోయిందని పలువురు అభిప్రాయపడ్డారు.
