ఆంధ్రప్రదేశ్లో ప్రతి ఇంటికీ కుళాయి ద్వారా సురక్షితమైన తాగునీరు అందించాలనే లక్ష్యంతో కేంద్ర ప్రభుత్వం చేపట్టిన జల్ జీవన్ మిషన్ పనులను పూర్తి చేయడానికి ఏపీ ప్రభుత్వం కీలక ముందడుగు వేసింది. ఈ పనుల వేగాన్ని పెంచడానికి యుద్ధ ప్రాతిపదికన చర్యలు చేపట్టిన ప్రభుత్వం, నేషనల్ బ్యాంక్ ఫర్ ఫైనాన్సింగ్ ఇన్ఫ్రాస్ట్రక్చర్ అండ్ డెవలప్మెంట్ (NaBFID) నుంచి పదివేల కోట్ల రూపాయల రుణాన్ని తీసుకోనుంది. ఈ రుణాన్ని అందించడానికి NaBFID సూత్రప్రాయంగా అంగీకరించింది. కమిటీ ఆమోదం లభిస్తే, ఈ నెల చివరి నాటికి రుణం మంజూరు అయ్యే అవకాశం ఉంది.
గతంలో భూగర్భ జలాలపై ఆధారపడటం వల్ల వేసవిలో నీటి సరఫరాలో తీవ్ర అంతరాయాలు ఏర్పడేవి. ఈ సమస్యను పరిష్కరించడానికి, ప్రస్తుత ప్రభుత్వం నదులు మరియు రిజర్వాయర్ల నుంచి నీటిని సేకరించి, పైప్లైన్ల ద్వారా సంవత్సరమంతా సురక్షితమైన తాగునీటిని అందించేలా ప్రణాళికను సవరించింది. ఈ సమగ్ర ప్రాజెక్టు కోసం రూ. 84,500 కోట్ల విలువైన డీపీఆర్ (DPR)ను తయారు చేశారు. అయితే, NaBFID నుంచి రూ.10,000 కోట్ల రుణం లభించాలంటే, ఈ డీపీఆర్ను కేంద్ర ప్రభుత్వం తప్పనిసరిగా ఆమోదించాలి.
గత ప్రభుత్వ హయాంలో ఈ జల్ జీవన్ మిషన్ పనుల అమలులో నిర్లక్ష్యం జరిగింది. గత ప్రభుత్వం కేవలం రూ.4,000 కోట్లు మాత్రమే కేటాయించిందని, పనులు అసంపూర్తిగా ఉండటం వలన తాగునీటి సరఫరా లక్ష్యం నెరవేరలేదని అధికారులు ఆరోపించారు. ప్రస్తుత ప్రభుత్వం ఈ పెండింగ్లో ఉన్న పనులను పూర్తి చేయడంపై దృష్టి సారించింది. రాబోయే రెండు నుంచి మూడు సంవత్సరాలలో ఈ పనులను పూర్తి చేసి, రాష్ట్రంలోని 25 లక్షల కంటే ఎక్కువ ఇళ్లకు కుళాయి కనెక్షన్లు అందించాలని లక్ష్యంగా పెట్టుకుంది. ఈ ప్రయత్నం విజయవంతమైతే, తాగునీటి సరఫరాలో అంతరాయాలు లేకుండా, రాష్ట్ర ప్రజలకు నిరంతరాయంగా సురక్షితమైన నీరు లభించనుంది.
