ఆంధ్రప్రదేశ్ రాష్ట్రానికి క్వాంటం టెక్నాలజీ రంగంలో దేశాన్ని ముందుండి నడిపించే సామర్థ్యం ఉందని రాష్ట్ర విద్య, ఐటీ శాఖల మంత్రి నారా లోకేష్ పేర్కొన్నారు. క్వాంటం కంప్యూటింగ్ అంశంపై సీఐఐ (CII) భాగస్వామ్య సమ్మిట్ ప్రాంగణంలో జరిగిన సదస్సులో ఆయన పాల్గొన్నారు. ఈ సందర్భంగా, క్వాంటం మిషన్, యాక్షన్ ప్లాన్, రోడ్ మ్యాప్ రూపొందించిన తొలి రాష్ట్రాలలో ఆంధ్రప్రదేశ్ ఒకటిగా నిలిచిందని తెలిపారు. ఏపీలో తాము కేవలం కలలు కనడం కాకుండా, వాటిని సాకారం చేస్తామని లోకేష్ స్పష్టం చేశారు. అమరావతిలో క్వాంటం వ్యాలీ కోసం నాలుగు ముఖ్యమైన పునాదులను రూపొందించడం జరిగింది. వాటిలో క్వాంటం కంప్యూటర్ ఏర్పాటు, సాఫ్ట్వేర్ అభివృద్ధి, ప్రతిభావంతమైన ఎకోసిస్టమ్ నిర్మాణం, మరియు హార్డ్వేర్ మాన్యుఫ్యాక్చరింగ్ వంటి అంశాలు ఉన్నాయని ఆయన వివరించారు.
క్వాంటం టెక్నాలజీ రంగంలో దేశాన్ని ముందుకు నడిపించే సామర్థ్యం ఏపీకి ఉందని మంత్రి నారా లోకేష్ పునరుద్ఘాటించారు. సీఎం చంద్రబాబు క్వాంటం కంప్యూటర్ తీసుకురావాలని చెప్పినప్పుడు, తాను మొదట్లో చాట్ జీపీటీని ఉపయోగించి క్వాంటం మిషన్ గురించి తెలుసుకున్నానని, కానీ ఇప్పుడు పూర్తిస్థాయి మిషన్ ను నిర్మించే స్థాయికి వచ్చామని పేర్కొన్నారు. అనంతరం, మంత్రి నారా లోకేష్ ఆంధ్రప్రదేశ్ క్వాంటం కంప్యూటింగ్ పాలసీ (2025-30) ని అధికారికంగా విడుదల చేశారు. ఈ సందర్భంగా, క్వాంటం టెక్నాలజీ రంగంలో పనిచేస్తున్న 23 సంస్థలతో రాష్ట్ర ప్రభుత్వం ఎంవోయూలు (MOU) కుదుర్చుకోవడం జరిగింది.
క్వాంటం కంప్యూటింగ్ పాలసీ విడుదలతో పాటు, రాష్ట్ర విద్య, ఐటీ శాఖల మంత్రి నారా లోకేష్ వరల్డ్ ఎకనామిక్ ఫోరం (WEF) సెంటర్ ఫర్ ఫ్రాంటియర్ టెక్నాలజీస్ మేనేజింగ్ డైరెక్టర్ జెరెమీ జుర్గెన్స్ తో భేటీ అయ్యారు. ఈ భేటీలో ప్రధానంగా సైబర్ రక్షణ అంశంపై చర్చించారు. ప్రపంచవ్యాప్తంగా సైబర్దాడులు పెరుగుతున్నాయని, ఇవి ఆర్థికాభివృద్ధికి ప్రతిబంధకంగా మారుతున్నాయని, కాబట్టి బలమైన సైబర్ సెక్యూరిటీ అవసరమని లోకేష్ అన్నారు. ఆంధ్రప్రదేశ్ ఐటీ హబ్గా అభివృద్ధి చెందుతున్న నేపథ్యంలో, ప్రభుత్వం పరిశ్రమలు, విద్యాసంస్థలు మరియు ప్రపంచ నిపుణులతో కలిసి పనిచేయడం ద్వారా సరికొత్త ఆవిష్కరణలకు దోహదం చేస్తుందని ఆయన తెలిపారు.
