తెలంగాణ ప్రభుత్వం మోడల్ స్కూల్ టీచర్లకు (Model School Teachers) భారీ ఊరటనిచ్చే కీలక నిర్ణయం తీసుకుంది. ఏళ్ల తరబడి పెండింగ్లో ఉన్న వారి సీనియారిటీ సమస్యకు పరిష్కారం చూపుతూ, ఫేజ్ 2 టీచర్లకు కూడా ఫేజ్ 1 టీచర్లతో సమానంగా 2013 నుంచి సీనియారిటీ వర్తింపజేస్తూ విద్యాశాఖ ఉత్తర్వులు జారీ చేసింది. దీనినే నోషనల్ సర్వీసు (Notional Service) అమలు అని అంటారు. ఈ నిర్ణయం వల్ల వందలాది మంది టీచర్లకు ప్రయోజనం చేకూరనుంది.
మోడల్ స్కూల్ ఫేజ్ 2 టీచర్లకు సంబంధించి హైకోర్టు ఇచ్చిన తీర్పును గౌరవిస్తూ, విద్యాశాఖ ప్రిన్సిపల్ సెక్రటరీ తాజాగా మెమో నం.4953 ద్వారా ఈ ఉత్తర్వులను విడుదల చేశారు. 2014, సెప్టెంబర్లో విధుల్లో చేరిన ఫేజ్ 2 (పీజీటీ, టీజీటీ) టీచర్లు, తమను కూడా 2013లో చేరిన ఫేజ్ 1 టీచర్లతో సమానంగా గుర్తించాలని కోరుతూ న్యాయస్థానాన్ని ఆశ్రయించారు. కోర్టు వారికి అనుకూలంగా తీర్పు ఇవ్వడంతో ప్రభుత్వం ఈ నిర్ణయం తీసుకుంది.
తాజా ఉత్తర్వుల ప్రకారం, ఫేజ్ 2 టీచర్లకు సీనియారిటీ 2013 నుంచి లెక్కించినప్పటికీ, పెరిగిన జీతాలు మాత్రం ఈ సంవత్సరం (2025) ఏప్రిల్ 1 నుంచి కొందరికి, జులై 1 నుంచి మరికొందరికి అందుతాయి. ఈ నిర్ణయం వల్ల 768 మంది పీజీటీలు మరియు 558 మంది టీజీటీలు సహా మొత్తం 1326 మందికి లబ్ధి చేకూరుతుంది. సీనియారిటీ సమానం కావడంతో ప్రమోషన్లలో కూడా అందరూ సమాన అవకాశాలను పొందనున్నారు.
