తమిళ హీరో కార్తీ నటించిన మరియు నలన్ కుమారస్వామి దర్శకత్వం వహించిన సినిమా ‘వా వాతియార్’ (తెలుగులో ‘అన్నగారు వస్తారు’). ఎట్టకేలకు డిసెంబర్ 12న విడుదల తేదీ ఖరారు చేసుకున్న ఈ చిత్రానికి, చివరి నిమిషంలో మద్రాస్ హైకోర్టు నుంచి ఊహించని షాక్ తగిలింది. కోర్టు ఆదేశాల మేరకు ఈ సినిమా విడుదల వాయిదా పడింది. ఈ పరిణామంతో ఫైనాన్షియల్ ఇష్యూస్ కారణంగా సినిమా వాయిదా పడుతోందనే వార్తలు వినిపిస్తున్నాయి.
సినిమా విడుదల వాయిదా పడటానికి ప్రధాన కారణం, నిర్మాత జ్ఞానవేల్ రాజా తన నిర్మాణ సంస్థ ‘స్టూడియో గ్రీన్’ తరపున వ్యాపారవేత్త అర్జున్ లాల్ వద్ద తీసుకున్న రుణమే. జ్ఞానవేల్ రాజా తీసుకున్న ₹10.35 కోట్ల రుణాన్ని వడ్డీతో కలిపి ₹21.78 కోట్లు చెల్లించడంలో విఫలమవడంతో, రుణదాత మద్రాస్ హైకోర్టును ఆశ్రయించారు. దీనిపై విచారణ జరిపిన న్యాయస్థానం, అప్పు చెల్లించే వరకు సినిమా విడుదలకు మధ్యంతర స్టే విధిస్తూ ఉత్తర్వులు జారీ చేసింది.
నటి కృతి శెట్టి హీరోయిన్గా నటించిన ఈ చిత్రం విడుదల వాయిదా పడటంపై అభిమానుల్లో నిరాశ నెలకొంది. ఈ కీలక న్యాయపరమైన ఆదేశాల కారణంగా, రేపు (డిసెంబర్ 12) విడుదల కావాల్సిన కార్తీ సినిమా విడుదల నిలిచిపోయింది. న్యాయస్థానం పూర్తి అప్పు చెల్లించే వరకు విడుదల చేయకూడదని స్పష్టం చేయడంతో, సమస్య పరిష్కారం అయ్యే వరకు సినిమా విడుదల ఆలస్యం కానుంది.
