తెలంగాణ రాష్ట్రంలో ప్రజా రవాణా (TSRTC) వ్యవస్థలో అభివృద్ధి కోసం ఇటీవల తీసుకున్న కీలక నిర్ణయాలకు ముఖ్యమంత్రి రేవంత్ రెడ్డి సర్కార్ మరొక ముఖ్యమైన పథకాన్ని ప్రకటించింది. రాష్ట్రవ్యాప్తంగా ఉన్న బస్ స్టేషన్లను ఆధునీకరించడానికి ₹200 కోట్ల రూపాయలను కేటాయించిన ప్రభుత్వం, ఈ నిధులతో పలు బస్టాండ్ల విస్తరణ, పునర్నిర్మాణం మరియు ఆధునీకరణ పనులను ప్రారంభించింది. ప్రస్తుతం చాలా బస్టాండ్లలో అనేక సౌకర్యాల కొరత ఉన్నదని ప్రయాణికులు ఆందోళన వ్యక్తం చేస్తుండగా, ఈ నిర్ణయం కొంత ఉపశమనం కలిగించనుంది.
ప్రస్తుతం (TSRTC) తెలంగాణలో ములుగు, మధిర, మంథని వంటి ప్రాంతాల్లో కొత్త బస్టాండ్ల నిర్మాణం ప్రారంభమైందని ఆర్టీసీ అధికారులు తెలిపారు. అలాగే, మాడ్గుల్, రేగొండ, నాగర్ కర్నూల్ వంటి ప్రాంతాల్లోనూ కొత్త బస్టాండ్ల నిర్మాణం త్వరలోనే ప్రారంభమవుతుంది. కొన్ని బస్ స్టేషన్ల ఆధునీకరణ పనులు కూడా మొదలయ్యాయి. మునుగోడు, గోదావరి ఖని, ఘనపూర్, గూడూరు, వేములవాడ వంటి ప్రాంతాల్లో పునర్నిర్మాణం, విస్తరణకు త్వరలోనే పనులు మొదలు కావడం అనుకున్నది.
ఈ ప్రణాళికలో భాగంగా, ప్రస్తుత రవాణా వ్యవస్థను మరింత సమర్థంగా మార్చడం కోసం తెలంగాణ ప్రభుత్వం ₹200 కోట్ల రూపాయలను కేటాయించింది. 2047 నాటికి తెలంగాణలో ప్రజా రవాణా వ్యవస్థను 28 శాతం నుంచి 70 శాతానికి పెంచాలనే లక్ష్యంతో సీఎం రేవంత్ రెడ్డి ఈ పనులను ముందుకు తీసుకెళ్లాలని భావిస్తున్నారు. ఈ భారీ కేటాయింపులు, లక్ష్యం రాష్ట్ర రవాణా రంగంలో పెద్ద మార్పుకు సంకేతాలుగా ఉన్నాయి.
