తెలంగాణ దేవాలయాల్లో స్వచ్ఛమైన నెయ్యి
తిరుమల శ్రీవారి లడ్డూ కల్తీ వ్యవహారంపై స్పందించిన ముఖ్యమంత్రి రేవంత్ రెడ్డి, ఇది పొరుగు రాష్ట్రమైన ఆంధ్రప్రదేశ్కు సంబంధించిన అంశమని పేర్కొన్నారు. అయితే, తెలంగాణలో అటువంటి పరిస్థితి రాకుండా ముందస్తు జాగ్రత్తలు తీసుకున్నామని ఆయన స్పష్టం చేశారు. రాష్ట్రంలోని అన్ని ప్రధాన దేవాలయాల్లో ప్రసాదాల తయారీకి కేవలం విజయ డెయిరీ నెయ్యినే ఉపయోగిస్తున్నామని, నాణ్యత విషయంలో రాజీ పడే ప్రసక్తే లేదని హామీ ఇచ్చారు.
కల్వకుంట్ల కుటుంబంలో పంపకాల గొడవలు
కల్వకుంట్ల కవిత జైలుకు వెళ్లిన ఉదంతంపై రేవంత్ రెడ్డి ఎద్దేవా చేస్తూ, ఆమె జైలులో ఉంటే ఇక్కడ కేటీఆర్, హరీశ్ రావు ముఖ్యమంత్రి పదవి కోసం పోటీ పడుతున్నారని వ్యాఖ్యానించారు. “అంతా కలిసి సంపాదించారు, ఇప్పుడు పంపకాల్లో తేడాలు రావడంతో ఒకరిపై ఒకరు కొట్టుకుంటున్నారు” అని విమర్శించారు. ఇంటి సమస్యలను కూర్చుని పరిష్కరించుకోవాలని, తన సొంత ఇంటి బిడ్డను గౌరవించుకుంటే ఈ పరిస్థితి వచ్చేది కాదని హితవు పలికారు.
ఫోన్ ట్యాపింగ్ కేసులో కీలక పురోగతి
ఫోన్ ట్యాపింగ్ కేసు విచారణపై మాట్లాడుతూ, ఎస్ఐబీ మాజీ చీఫ్ ప్రభాకర్ రావును భారత్కు తీసుకురావడంలో కేంద్ర ప్రభుత్వం సహకరించలేదని ముఖ్యమంత్రి ఆరోపించారు. ఆయన 20 నెలల పాటు విదేశాల్లో తలదాచుకున్నారని, చివరకు సుప్రీంకోర్టు ఆదేశాలతోనే ఆయనను స్వదేశానికి తీసుకువచ్చామని తెలిపారు. ప్రభాకర్ రావు రాకతో ఈ కేసు విచారణ ఇప్పుడు వేగవంతమైందని, అసలు దోషులెవరో త్వరలోనే తేలుతుందని రేవంత్ రెడ్డి స్పష్టం చేశారు.
