తెలంగాణ మున్సిపల్ ఎన్నికల ఫలితాలపై బీఆర్ఎస్ వర్కింగ్ ప్రెసిడెంట్ కేటీఆర్ సంతృప్తి వ్యక్తం చేశారు. తెలంగాణ భవన్లో జరిగిన మీడియా సమావేశంలో ఆయన మాట్లాడుతూ.. రాష్ట్రంలో అధికార కాంగ్రెస్కు అసలైన ప్రత్యామ్నాయం బీఆర్ఎస్ పార్టీయేనని ఈ ఫలితాలు నిరూపించాయని పేర్కొన్నారు. కాంగ్రెస్ పార్టీ అధికార బలంతో, పోలీసు యంత్రాంగాన్ని అడ్డుపెట్టుకుని ‘కృత్రిమ విజయాన్ని’ సాధించిందని ఆయన విమర్శించారు. డబ్బు, మద్యం విచ్చలవిడిగా ప్రవహించినప్పటికీ ప్రజల మనసులను గెలవడంలో అధికార పార్టీ విఫలమైందని మండిపడ్డారు.
ఎన్నికల గణాంకాలను వివరిస్తూ.. రాష్ట్రవ్యాప్తంగా ఉన్న 2,581 మున్సిపల్ వార్డులలో బీఆర్ఎస్ సుమారు 750 వార్డులను (దాదాపు 30 శాతానికి పైగా) గెలుచుకుందని కేటీఆర్ తెలిపారు. పార్టీకి ఉన్న 40 శాతం ఓటు బ్యాంకు చెక్కుచెదరలేదని, ఇది క్షేత్రస్థాయిలో పార్టీ బలానికి నిదర్శనమని ఆయన గుర్తు చేశారు. సింగరేణి ప్రాంతంలో బీజేపీని నిలువరించడానికి కొత్తగూడెం కార్పొరేషన్లో సీపీఐకి షరతుల్లేకుండా మద్దతిస్తామని ప్రకటించారు. బీజేపీ, కాంగ్రెస్ పార్టీలు కుమ్మక్కై రాష్ట్రాన్ని వంచిస్తున్నాయని ఆయన ఆరోపించారు.
ఈ మున్సిపల్ ఫలితాలను పునాదిగా చేసుకుని రాబోయే జీహెచ్ఎంసీ, ఎంపీటీసీ, జడ్పీటీసీ ఎన్నికలకు సమరోత్సాహంతో సిద్ధమవుతామని కేటీఆర్ ప్రకటించారు. ‘హంగ్’ ఏర్పడిన మున్సిపాలిటీల్లో అధికార పార్టీ చేసే ప్రలోభాలను సమర్థవంతంగా అడ్డుకుంటామని హెచ్చరించారు. ప్రతికూల పరిస్థితుల్లోనూ సైనికుల్లా పోరాడిన పార్టీ నాయకులకు, కార్యకర్తలకు మరియు సోషల్ మీడియా వారియర్లకు ఆయన కృతజ్ఞతలు తెలిపారు. రేవంత్ రెడ్డి ప్రభుత్వానికి తగిన గుణపాఠం చెప్పే రోజులు దగ్గరలోనే ఉన్నాయని ఆయన వ్యాఖ్యానించారు.
